TODAS ang dalawang hol-daper nang makipagbarilan sa mga otoridad sa Barangay Commonwealth, Quezon City, Miyerkules ng gabi.
Ayon kay Quezon City Police District (QCPD) Director, BGen Danilo Macerin, ang mga napatay ay nasa 35 hanggang 40 anyos, 5’4” hanggang 5’5” ang taas, katamtaman ang laki ng katawan, kapwa nakasuot ng Jag inner t-shirt at itim na jacket, at parehong armado ng kalibre .38 baril.
Samantala, tinutugis pa ng mga otoridad ang dalawa pang kasamahan ng mga ito na nakatakas.
Sa ulat, 11:50 ng gabi nang maganap ang engkwentro sa Doña Nicasia St., kanto ng Payatas Road, Brgy. Commonwealth.
Nauna rito, 8:30 ng gabi tinutukan ng baril at hinoldap ng grupo ang 33-anyos na rider habang ipinaparada ang kanyang motorsiklo sa footbridge, tapat ng Diliman Doctors Hospital.
Nang matangay ang pakay, tumakas ang mga ito sakay ang motorsiklo ng biktima kaya agad na nagtungo ang rider sa presinto at ini-report ang insidente.
Bandang 11:35 ng gabi hinoldap din ng grupo ang Mister Samgyupsal sa Phyton St., Brgy. Batasan Hills na pagmamay-ari ng isang Mary Joyce Moreno.
Sa ulat, na nagsasara na ng tindahan ang ginang nang biglang pumasok ang isa sa grupo at agad na nagdeklara ng holdap, tinangay ng mga ito ang kita at mahahalagang gamit ni Moreno.
Tumakas ang grupo sakay ng carnapped na motorsiklo, habang ini-report ni Moreno sa Batasan Police station 6 ang pangyayari.
Agad nagsagawa ng dragnet operation ang mga tauhan ng Tactical Motorcycle Unit (TMRU) at namataan ang dalawa na sakay ng motorsiklo.
Pinara ng mga awtoridad ang motorsiklo upang beripikahin ang identity ng mga ito, ngunit sa halip na huminto ay humarurot ito para tumakas.
Hinabol ng mga pulis ang motorsiklo hanggang sa makarating sa Nokia St., Brgy. Commonwealth, at nang makorner sa halip na sumuko ay pinutukan umano ng mga ito ang mga pulis, dahilan para paputukan din sila ng mga otoridad. (Boy Celario)
The post 2 holdaper todas sa shootout sa Quezon City appeared first on Police Files! Tonite.
Source: Police Files Tonite
Walang komento: