NASAWI ang dalawang senior citizens at tatlo ang sugatan nang mahulog ang sinasakyan nilang FX sa bangin sa bayan ng Tuba, Benguet.
Kinilala ang mga namatay na sina Aida Dontogan, 73 anyos; at Mely Bayacsan, 70; sugatan naman sina Rosa Ditchi, 75; Lucia Lestino, 72; at Joselito Solley, 70.
Sa report, minamaneho ni Aloy Atiway ang FX na galing ng Sitio Lubas, Barangay Ansagan at pauwi na sila sa Sitio Lusong nang mangyari ang aksidente.
Ayon sa ulat, sa paakyat na parte ng kalsada ay nabigong makaakyat ang sasakyan hanggang sa umatras nang umatras pababa at nawalan ng kontrol ang driver sa manibela kaya nahulog sa bangin na may lalim na 50 metro.
Dead-on-spot si Dontogan, samantalang binawian ng buhay si Bayacsan habang dinadala ng rescuers sa ospital.
Nabatid na nakalabas na ng ospital sina Lestino at Solley, habang naiwan pa si Ditchi dahil sa mga sugat sa katawan partikular sa ulo.
Isa sa mga pasahero ng FX na kinilalang si Larry Martin ang hindi nagalusan sa naturang aksidente nang agad itong makatalon palabas ng sasakyan nang maramdaman niyang nasa panganib na sila.
Nasa kustodya ng pulisya ang driver ng FX na nagtamo rin ng minor injury.
The post FX nahulog sa bangin: 2 senior patay, 3 sugatan appeared first on Police Files! Tonite.
Source: Police Files Tonite
Walang komento: