ISABELA – Mahigit sa P16 milyong halaga ng pinatuyong dahon ng marijuana at shabu ang nasabat sa dalawang tulak sa drug buy bust operation ng pulisya sa Barangay Abut, Quezon, Isabela.
Sa ipinarating na ulat kay Cololonel James Cipriano, Provincial Director ng Isabela Police Provincial Office, ang dalawang nadakip ay kinilalang sina Anwar Sindatoc, 54 anyo, drayber, ng Las Piñas City; at Elson Cabunyag, 43, ng Port Area, Manila.
Nadakip ang dalawa sa operation ng pinagsanib na pwersa ng Provincial Drug Enforcement Unit (PDEU), Isabela Police Provincial Office (IPPO), Regional Drug Enforcement Unit 2 (RDEU2), Philippine Drugs Enforcement Agency Region 2, Provincial Explosives and Canine Unit ng Isabela, at Quezon Municipal Police Station.
Nakuha mula sa mga ito ang dalawang bricks ng marijuana na ibinenta nila sa poseur buyer na pulis sa halagang P30,000.
Nagtangka pang tumakas ang dalawa nang maramdamang pulis ang kanilang katransaksyon ngunit naharang sila sa Quarantine Checkpoint ng PNP Quezon at PECU Isabela sa nasabing bayan.
Nasamsam din mula sa kanilang sasakyan ang 125 bricks at 4 tubular ng marijuana na may bigat na 130 kilos at nagkakahalaga ng P16 milyon, isang caliber .45 Colt Mark 4 pistol na may pitong bala at mga bala ng M14 rifle.
Nakuhanan din ang dalawa ng humigit kumulang sa 3 gramo ng shabu na nagkakahalaga ng P20,400.00, iba’t ibang uri ng identification cards at 2cellphones na ginagamit nila sa kanilang transaksyon.
Agad dinala sa crime laboratory ang dalawa para isailalim sa drug test, samantalang ang mga nakuhang ebidensya ay nasa kustodiya na ng PDEA Region 2.
Kaugnay nito, pinuri ni BGen.Crizaldo Nieves, Regiona Director ng PRO- 02 ang kanyang mga pulis at PDEA operatives na nasa likod ng matagumpay na operasyon.
Nahaharap sa kasong paglabag sa Republic Act 9165 at Republic Act 10591 sina Sindatoc at Cabunyag.
(Rey Velasco)
The post 2 tulak mula Las Piñas at Maynila huli P16m marijuana at shabu sa Isabela appeared first on Police Files! Tonite.
Source: Police Files Tonite
Walang komento: