Pulis nakabangga ng sasakyan at nagpaputok ng baril sinibak

SINIBAK na sa puwesto ang isang pulis na nagpaputok ng baril at nakabangga ng sasakyan, dahilan para kuyugin ito ng mga residente sa Dasmariñas, Cavite.
Kinilala ang pulis na si Staff Sergeant Ismael Dulin, miyembro ng Warrant Section ng Dasmariñas Police.
Ayon sa hepe ng Dasmariñas City Police na si Lt.Col. Abraham Abayari, agad siya nag-deploy ng mga SWAT Police sa lugar para rumisponde at naaresto si Dulin.
Wala namang nagtamo ng sugat sa insidente, at nakipag-ayos na ang dalawang may-ari ng sasakyang nakabanggaan ng pulis.
Gayunman, dinisarmahan ng Dasmariñas Police si Dulin, inalis sa puwesto at kinasuhan.
Nag-viral sa social media ang insidente kungsaan makikita sa cellphone video ang isang dark gray na kotseng may nakabangga ring isang kotse sa kabilang lane.
Ilang saglit pa, umusad na ang kotse kaya hinabol ito ng mga residente at ilang miyembro ng TODA.
Nauwi ang panghahabol sa pagkuyog at pamamato sa sasakyan. Bumaba ang driver ng dark gray na kotse at nagpa-putok ng ilang beses.
Lumabas sa imbestigasyon na nagkasabitan sa isang kanto ang sasakyan ng pulis at dalawa pang sasakyan.
Depensa ni Dulin, itatabi lang niya ang kaniyang kotse at wala siyang balak tumakas pero nang pagbabatuhin, kuyugin at tamaan ng malalaking bato, napilitan siyang magpaputok ng baril para ipagtanggol ang sarili.

The post Pulis nakabangga ng sasakyan at nagpaputok ng baril sinibak appeared first on Police Files! Tonite.

Source: Police Files Tonite