MAYOR NG FAMY, LAGUNA AT KANYANG MOMMY SABAY NAMATAY SA COVID-19

LAGUNA – Nagluluksa ngayon ang bayan ng Famy dito sa lalawigan nang magkasunod na masawi sa Covid-19 ang kanilang alkalde at ina nito nitong Linggo.

Ayon kay Provincial Public Affairs Officer, Rommel Palacol, isinugod sa Global City Medical Hospital sa bayan ng Bay si Famy Mayor Edwin Pangilinan, 53, noong Marso 15, 2021, nang hindi nito makayanan ang mabigat na nararamdaman sa kanyang katawan.

Kabilang din, aniya, na isinugod sa Holy Family Clinic sa bayan ng Sta. Cruz ang kanyang ina na si Lucena, 76, bunsod ng masama rin nitong pakiramdam matapos dapuan din naturang virus.

Nabatid na unang dinapuan ng sakit ang alkalde mahigit isang linggo na ang nakakaraan pero nagdesisyon itong manatili lang sa kanyang kubo para doon ito magpagaling kasama ang kanyang ina na siyang nag-aalaga sa kanya. Hindi inaasahang lumala ang kanilang kalalagayan.

Naunang binawian nang buhay ang ina ng alkalde, sumunod ito pasado 10:00 ng umaga sa magkahiwalay na ospital.

Inaalam ngayon ng mga awtoridad kung kanino at saan nahawa ang alkalde na nasa ikalawang termino palang.

Samantala, sa bayan ng Siniloan na karatig bayan ng Famy ay naitala ang maraming nahawa ng virus na pawang miyembro ng Sangguniang Bayan kabilang ang nasa anim pa na Barangay Chairman.

Kaugnay nito, lubhang naalarma ang maraming mamamayan sa lugar kaya pinaalalahanan ang lahat ng ibayong pinag-iingat. (DICK GARAY)

The post MAYOR NG FAMY, LAGUNA AT KANYANG MOMMY SABAY NAMATAY SA COVID-19 appeared first on Police Files! Tonite.

Source: Police Files Tonite