ISANG pastor na nasa ‘top 4 most wanted person’ ang dinakip sa kasong panggagahasa ng pitong beses sa menor-de-edad na anak sa Solana, Cagayan.
Ayon sa report na ipinarating ng Solana PNP sa Police Regional Office 2 (PRO2), kinilala ang pastor na si Cesar Ablao, 54, residente ng Barangay Sampaguita sa nabanggit na bayan.
Sa ulat, dinakip si Ablao ng pinagsanib na pwersa ng 1st Cagayan Provincial Mobile Force Company at Solana PNP sa bisa ng warrant of arrest na ipinalabas ni Judge Lyliha Abella-Aquino ng Regional Trial Court Branch 4, Tuguegarao City, Cagayan noong Hulyo 19, 2021.
Napag-alaman na unang sinampahan ng kasong rape si Ablao ng kanyang misis noong Marso 4, 2021 sa sekswal na pang-aabuso nito sa kanilang 13-anyos na anak.
Ayon sa pulisya, Hulyo 7, 2021ay muling dumulog sa Solana PNP ang biktima kasama ang kanyang ina nang pagbantaan silang ng akusado na papatayin kung hindi iuurong ang demanda laban sa kanya.
Sa kabila ng takot, hindi inatras ng mag-ina ang kaso hanggang sa madakip ito ng pulisya.
Bukod sa kasong paglabag sa Republic Act 8353 o Anti-Rape Law of 1997, nahaharap din si Ablao sa paglabag sa Republic Act 9262, Anti-Violence against Women and their Children Act at Republic Act 10591 o Comprehensive Firearms and Ammunition Regulation Act nang makuhanan ng isang shot gun.
Nakakulong ngayon si Ablao sa Solana-PNP.
The post ‘Demonyong pastor’ ginahasa ng 7 beses ang 13-anyos na anak appeared first on Police Files! Tonite.
Source: Police Files Tonite
Walang komento: