HUMAKOT ng parangal ang Department of Public Works and Highways (DPWH) Region 1 office sa ilalim ng pamumuno ni Regional Director Ronnel M Tan (RD Tan), bilang Top Performing Implementing Unit ng nabanggit na kagawaran sa katatapos na Unified Directors Meeting na ginanap nitong Setyembre 10, 2021 sa Hilton Clark Sun Valley Resort, Clark Freeport, Pampanga. Ang karangalan ay base sa pinakahuling datos na inilabas ng ahensya nitong huling bahagi ng Agosto, 2021.
Si RD Tan ay tumanggap ng mga papuri mula sa iba’t ibang sektor, partikular kay DPWH Secretary Mark Villar. Sinabi ng kalihim na ang tagumpay ng DPWH Region 1 ay patunay lamang ng dedikasyon sa serbisyo at husay sa pamamahala ng direktor nito, kabilang na ang lahat ng bumubuo ng lokal na tanggapan.
Labis na ikinatuwa ni RD Tan ang iginawad na parangal at ibinahagi niya ito sa lahat ng kanyang mga kasamahan na kanya ring pinasalamatan at kanyang inilarawan bilang masisipag na mga kawani at maaagap na tumutugon sa pang-araw-araw na suliranin ng lokal na tanggapan.
Base sa inilabas na datos, nahigitan ng DPWH Region 1 ang target nitong 87% Absortive Capacity o ang tamang paglaan o paggamit ng budget sa ilalim ng 2021 General Appropriations Act na nakalaan sa kagawaran, habang umabot naman sa 97% ang performance rating nito.
Nanguna rin ang DPWH Region 1 sa wasto at mabilis na paglalaan ng pondo nitong unang bahagi ng taong 2021. Ang karangalan ay nakamit dahil sa mabilis na pamamahagi ng pondo sa mga isinasagawang proyekto ng DPWH sa nasabing rehiyon.
Hindi na bago ang pagtanggap ng mga karangalang ito para kay RD Tan, katunayan ang direktor ay ilang ulit ng nabigyang pagkilala dahil sa husay at galing nito sa pamamahala na kinilala bilang most awarded Regional Field Executive sa mga nakalipas na taon.
Ang kasalukuyang parangal na natanggap ng DPWH Region 1 ay magsisilbing inspirasyon sa lahat ng bumubuo ng regional office upang gampanan ang kanilang mga tungkulin ng higit pa sa inaasahan sa kabila ng bantang panganib na dulot ng COVID-19.
The post DPWH Region 1 office, humakot ng parangal appeared first on Police Files! Tonite.
Source: Police Files Tonite
Walang komento: