PATAY ang isang AWOL (Absent Without Leave) na Pulis-Maynila nang pagbabarilin sa Sta. Ana, Maynila, nitong Huwebes.
Kinilala ang biktima na si SSgt Gilbert Fabro, 34 anyos, dating miyembro ng Presidential Security Group (PSG), ng Juan Luna St., Barangay149, Tondo. Hindi naman sinaktan ang kaniyang misis, anak na isang taon gulang at isa pang kasama.
Sa ulat, 1:12 ng hapon ng Miyerkoles nang maganap ang krimen sa parking lot ng isang restoran sa may Tejeron St., Sta. Ana sa Barangay 783, kungsaan kumain ng tanghalian si Fabro at ang kaniyang pamilya.
Makikita sa CCTV footage ang pagpasok ni Fabro sa driver’s side ng isang puting van sa tapat ng restaurant.
Kasama ng biktima si alyas “Sky”, kaibigan na dati ring pulis.
Ilang sandali lamang, isang delivery truck ang pumarada sa tabi ng puting van na sinakyan ni Fabro.
Dumating ang isang lalaking nakasuot ng cap, bumunot at kinasa ang hawak na baril at pinaputukan si Fabro.
Agad na tumakas ang gunman, habang nagtamo ng mga tama ng bala sa katawan ang biktima.
Isinugod si Fabro sa Santa Ana Hospital ngunit idineklarang dead on arrival.
Ayon sa asawa ni Fabro, nakatanggap ang kanyang mister ng death threats nang akusahan ito na sangkot sa mga iligal na gawain habang nasa serbisyo pa.
“2019, nagpumilit siya patunayan sa sarili niya, ‘Kung guilty ako, magtatago ako eh. Hindi ako guilty.’ Ang sabi, illegal activities. Ang akin lang, tinanong namin, illegal activities, anong klase? Hindi nila kami binigyan ng detalye,” anang misis ni Fabro.
Napilitan si Fabro na mag-AWOL noong 2019 dahil sa insidente.
“Dahil trained naman siya, naramdaman niyang may sumusunod sa kaniya palagi. Kungsaan saang shortcut na raw siya dumadaan para lang iligaw ‘yung sumusunod,” dagdag ng asawa ni Fabro.
Narekober sa pinangyarihan ng krimen ang tatlong basyo ng kalibre .45.
Patuloy pang nagsasagawa ng imbestigasyon ang pulisya sa krimen.
The post AWOL na Pulis-Maynila itinumba sa harap ng mag-ina appeared first on Police Files! Tonite.
Source: Police Files Tonite
Walang komento: