TIMBOG ang isang nagpapanggap na empleyado ng National Bureau of Investigation (NBI) sa pangingikil sa isang NBI Clearance applicant.
Ayon kay NBI Officer-in-Charge (OIC)- Director Eric B. Distor, inaresto ng NBI-Special Action Unit ang kotongero na si Mark Endaya Cabal.
Nag-ugat ang reklamo laban kay Cabal nang magsumbong ang kanyang nabiktima na nakilala sa labas ng NBI Clearance building.
Nakasuot ng NBI polo shirt si Cabal kaya inakala ng biktima na kawani ito ng ahensya kaya dito ito nagtanong kung saan makakakuha ng NBI Clearance.
Inalok ni Cabal ang complainant na tulungang makakuha ng NBI Clearance nang sabihin ng huli na mayroon itong pending drug case na may warrant of arrest.
Tinakot pa ni Cabal ang biktima na maaresto siya kapag hindi ito nagbigay ng P100,000.
Dahil dito, bumalik kinabuksan ang biktima at nagbigay ng P40,000 kay Cabal, nguni’t patuloy ang kanyang pananakot na maaring hindi lamang siya makulong kundi ay maari pa siyang mapatay dahil sa pagkakasangkot sa droga.
Nakiusap ang biktima na bigyan pa siya ng isang linggo upang makapaghanap ng karagdagang P60,000.
Sa tulong ng payo ng kanyang mga kaibigan, dumulog ang biktima sa NBI-SAU upang maghain ng reklamo laban kay Cabal at agad na ikinasa ang entrapment operation, kungsaan nagkita ang dalawa sa loob ng NBI Headquarters parking lot.
Nang maiabot na ng biktima ang pera kay Cabal, dinakma ito ng mga ahente ng NBI.
Sa beripikasyon ng NBI-SAU, marami nang reklamong kinakaharap si Cabal sa kasong Robbery/Extortion at Estafa.
(Jocelyn Domenden)
The post Pekeng NBI agent timbog sa pangingikil sa NBI Clearance appeared first on Police Files! Tonite.
Source: Police Files Tonite
Walang komento: