INIHAYAG ni Senator Christopher “Bong” Go na lahat ng Filipino ay magkakaroon ng access sa COVID-19 vaccines batay sa “order of priority” ng mga sektor na tinukoy ng mga awtoridad at health experts.
Tiniyak din ni Go na ang vaccination program ay nakabase sa siyensa at hindi sa pulitika, lalo sa pagbibigay ng access sa mga nangangailangan.
“Wala pong problema, alam niyo po itong bakunang ito ay para po ito sa lahat ng Pilipino, mapakritiko ka man o mahal niyo man kami,” ayon kay Go.
Ginarantiyahan din ng senador na itatrato ng pamahalaan ang bawat isa nang parehas, anoman ang kanilang pampulitikang paniniwala.
“Ulitin ko, mahal niyo man kami o hindi, para po ito sa Pilipino, pantay-pantay po tayo na Pilipino,” paniniyak ni Go.
Imbes na magsisihan at masiraan, hinikayat ni Go ang lahat ng “detractors” ng gobyerno na makiisa at makipagtulungan na lamang upang makabangon ang bansa mula sa pandemya.
“Dapat po magkaisa tayo at huwag na tayong magsisihan sa panahong ito dahil ang importante po ay malagpasan natin itong krisis na ito,” sabi ni Go.
Sinabi ng senador na malayang-malayang batikusin ninoman ang pamahalaan pero iwasan ang pagpapakalat ng maling impormasyon at fake news.
“Ako po, masaya na po ako kapag malagpasan natin itong krisis na ito dahil patuloy po kayong mag-criticize po muli,” ani Go.
“Ito naman po, this is democracy po. Karapatan niyo pong batikusin ang ating gobyerno, basta totoo lang po ang gagawin niyong information, totoo lang po,” dagdag niya.
Sinabi ni Go na ang pagpapakalat ng maling impormasyon ay nakapagbibigay ng kalituhan at hindi nakatutulong sa pagsisikap ng bansa ma malabanan ang COVID-19.
“Huwag kayong magpakalat ng disinformation dahil hindi po ‘yan makakatulong sa ating mga kababayan,” ayon sa senador. (PFT Team)
The post Bong Go sa mga kritiko: Pagbabakuna ‘wag sirain ng pamumulitika appeared first on Police Files! Tonite.
Source: Police Files Tonite
Walang komento: