Dating sundalo inginuso sa pagsusugal, huli rin sa droga

PATONG-PATONG na kaso ang kahaharapin ng isang dating sundalo at kasama niyang lalaki na inaresto sa Barangay West Rembo, Makati, Miyerkules ng gabi.

Kinilala ang mga naaresto na sina John Eymer Rapsing, 35 anyos, dating sundalo; at Alexis Reyes, 43, taga-Cavite.

Ayon sa hepe ng Makati Police na si Col. Harold Depositar, iligal na pagsusugal gamit ang dice ang unang isinumbong sa mga taga-Makati Police Intelligence Section laban sa mga suspek.

Pero nang arestuhin, nahulihan pa ang mga suspek ng baril, mga bala, at halos P70,000 halaga ng shabu.

Nakuha din kay Rapsing ang caliber .380 na may magazine at 2 sachet ng shabu.

Ayon sa report, na-discharge si Rapsing mula sa Philippine Army dahil sa pag-AWOL nito.

Nakuha naman ang 7 sachet ng shabu kay Reyes.

Nahaharap ang mga suspek sa kasong illegal gambling, illegal possession of firearms and ammunition, at possession of illegal drugs.

Dagdag ng pulisya, nagbigay-impormasyon si Rapsing tungkol sa mga kilala niyang sangkot sa robbery hold-up incident sa Bulacan.

Kaya sa follow-up operation sa itinurong safehouse ng grupo sa Barangay Hagonoy, Taguig, narekober ang 3 armas kabilang ang shotgun at rifle, mga bala, pati mga pixelized field service uniform at iba pang gamit ng pulis gaya ng radyo, vest, at bag. (Gaynor Bonilla)

The post Dating sundalo inginuso sa pagsusugal, huli rin sa droga appeared first on Police Files! Tonite.

Source: Police Files Tonite