NAKAHANAP ng kakampi si Manila City Mayor Francisco “Isko Moreno” Domagoso sa katauhan ni Cavite Gov. Jonvic Remulla nang kutyain ni Pangulong Rody Duterte dahil sa kanyang mga lumang sexy photos na kumakalat online.
Sa isang Facebook post, sinabi ni Remulla na hindi isyu ang nakaraan ni Isko, at iginiit na ang mahalaga ay kailan man hindi nagsinungaling, nagnakaw, pumatay ng tao at hindi nagdala ng kahihiyan sa mga residente ng Maynila bilang isang public servant.
Kung titingnan, aniya, ang mga litrato ni Isko na kumakalat ngayon sa social media ay noong panahon na artista pa ito at hindi noong siya ay bilang kagalang-galang na konsehal, vice mayor at kasalukuyang alkalde ng Lungsod ng Maynila.
Bagama’t hindi pinangalanan ni Remulla ang kritiko na pinatutungkulan nito, kamakailan lang ay kinutya ni Pangulong Duterte ang isang local chief executive dahil sa mga sexy photos nito online.
Bagama’t wala naman ding binanggit na pangalan si Pangulong Duterte, si Domagoso lamang ang tanging alkalde sa Metro Manila na gumanap dati sa mga sexy na mga pelikula bago paman naging politiko.
Gayunman, sinabi ni Remulla na kung nagawa man ni Isko ang mga sexy role noong ito ay aktor pa, ginawa niya ito para maiahon ang kanyang pamilya sa kahirapan.
Pagkakataon din aniya ito noon ni Isko para kumita sa kanyang pamilya.
Iginiit din ng gobernador ng Cavite na dapat ang pagpuna sa isang kalaban sa politika ay ibinabase lamang sa kakayahan nito sa serbisyo publiko at hindi sa nakaraan nito.
The post Gov. Remulla ipinagtanggol si Yorme sa upak ni Du30 appeared first on Police Files! Tonite.
Source: Police Files Tonite
Walang komento: