Pulis patay sa sagasa ng senglot sa checkpoint

PATAY ang isang police officer na naka-duty sa checkpoint nang masagasaan ng lasing na driver sa Parañaque City noong Biyernes (August 6).

Nalagutan ng hininga habang nilalapatan ng lunas sa Uni-Health Medical Hospital ang biktimang si Police Corporal Nestor Guslab Jr., 28 anyos, nakatalaga sa Parañaque City Police Station, na nagtamo ng matinding pinsala sa ulo.

Nasa custody na ng pulisya ang nakasagasang driver na si Dominic Alastair Davis, nasa hustong gulang.

Sa report ng Parañaque City Police, naganap ang insidente 11:25 ng gabi sa kahabaan ng Dr. A. Santos Avenue, harapan ng Loyola Memorial, Bgy. San Antonio ng nabanggit na lungsod.

Habang naka-duty ang biktima sa checkpoint sa lugar kaugnay ng ipinatutupad na ECQ bunsod ng pandemya, sumulpot ang isang humaharurot na kulay silver Toyota Corolla Altis na may plakang PQR 414.

Pinara ng mga pulis ang naturang sasakyan, subali’t hindi ito tumigil at nasagasaan nito si Guslab.

Tumakas si Davis patungong Baclaran area, pero hinabol ito ng mga pulis hanggang sa naabutan at nadiskubre na lasing ito sa alak at nakuhanan pa ng pinatuyong dahon ng marijuana.

Kaagad inaresto si Davis at dinala ito sa himpilan ng Parañaque City Police.

Mabilis na isinugod si Guslab sa Parañaque Medical Hospital, at inilipat sa Uni-Health Medical Hospital, ngunit namatay din ito.

Nahaharap sa patong-patong na kaso si Davis.(Gaynor Bonilla)

The post Pulis patay sa sagasa ng senglot sa checkpoint appeared first on Police Files! Tonite.

Source: Police Files Tonite