Vince proud sa 17 nominasyong nakuha sa 2022 Famas

Ni ARCHIE LIAO

SOBRANG proud ang actor-director at founder ng Philippine Stagers Foundation, Inc. na si Vince Tañada dahil humakot ng labingpitong nominasyon sa prestihiyosong Famas awards ang kanyang pelikulang iprinudyus na “Katips.”
Ani Vince, ang ma-nominate sa isang kategorya ay malaking bagay na para sa kanya subalit kung labingpito ay maituturing na nag-uumapaw na biyaya.
Aniya, ang nominasyon daw ay balidasyon ng hirap na dinanas nila habang ginagawa ang nasabing pelikula.
“We shot the film during the pandemic, so very challenging talaga siya. Katips is also my first professional and commercial film, kaya very thankful ako sa pagkilala. Iyong ma-nominate lang para sa amin is indeed a great blessing,” sey ni Vince.
Si Vince ay nominado sa kategoryang best actor sa pelikulang “Katips” na kasama niya si Jerome Ponce bilang co-nominee. Nominado rin siya sa kategoryang best screenplay, best director at best original song para sa nabanggit na pelikula.
Ilan pa sa nominasyon ng Katips ay ang Best Actress para kay Nicole Laurel Asensio, Best Supporting actor para kina Mon Confiado at Johnrey Rivas, Best Supporting actress para kay Adelle Ibarientos, Best Cinematography para kay Manuel Abanto, Best Original Song para kina Vince Tañada at Pipo Cifra, Best Musical Score para kay Pipo Cifra, Best Sound para kay Don Don Mendoza ng Outpost Visual Frontier, Best Editing para kay Marc Jason Sucgang, at Best Production Design para kay Roland Rubenecia.
Kasamang nominado ni Vince sa 2022 Famas awards best actor category sina Dingdong Dantes(“A Hard Day”),
Christian Bables (“Big Night”),Jerome Ponce (“Katips”), Daniel Padilla (“Kun Maupay Man It Panahon”) at Mon Confiado (“Arisaka”).
Makakatunggali ng “Katips” ng Philstagers Films sa kategoryang best picture ang “Kun Maupay Man It Panahon” ng Cinematografica, Planc at Quantum Films,”Big Night” ng Cignal Entertainment, Octobertrain Films at Quantum Films,”A Hard Day” ng Viva Films at “Arisaka”ng Ten17P.
Ang ika-70 edisyon ng awards night ng FAMAS (The Filipino Academy of Movie Arts and Sciences) ay gaganapin sa Metropolitan Theater sa Hulyo 30.

The post Vince proud sa 17 nominasyong nakuha sa 2022 Famas appeared first on Police Files! Tonite.

Source: Police Files Tonite