INANUNSYO ni Manila Mayor Honey Lacuna na maglulunsad ang pamahalaang lungsod ng Maynila ng programang magpapaunlad sa reading comprehension ng mga kabataan at hinikayat ang mga opisyal ng barangay na makiisa para sa tagumpay nito.
Sinabi ni Lacuna na ang office of the Division of City Schools sa pamumuno ni Superintendent Magdalena Lim at ang Manila City Library (MCL) ay pangungunahan ang nasabing programa kung saan dadalhin ang library services sa mga residente sa mga barangay at sa pamamagitan ng mobile libraries.
Layunin ng programa na hikayatin ang mga murang edad na magbasa ng magbasa, lalo na’t iniulat ni Senator Ralph Recto na ang Pilipinas ay pang-79 na puwesto lamang sa sa buong daigdig pagdating sa reading comprehension.
Inatasan din ng lady mayor ang MCL na bumisita sa ibang lungsod upang tingnan, pag-aralan at gayahin ang ginagawa ng mga ito upang mapaunlad pa ang umiiral at nag-o-operate na 11 libraries sa lungsod.
“Di naman masama manggaya lalo na kung maganda. Ganundin sa lungsod, lahat ng maganda ating ginagaya para maibigay ang tamang serbisyo sa mga batang Maynila. Ganundin naman ang ibang lungsod, napunta rin sila sa atin for bechmarking,” dagdag pa ng alkalde.
Ang mababang ranggo sa reading comprehension ng bansa, ayon kay Lacuna ay isang malaking hamon sa mga paaralan at silid aklatan sa lungsod at kailangan talagang lumikha ng programa na siyang magpapaunlad ng reading comprehension ng mga kabataan, maging ng writing skills ng mga ito.
Ayon pa kay Lacuna, ang mababang ranggo sa reading comprehension na nakuha ng bansa ay maaaring dahil din sa pandemya, kaya naman umaapela siya sa mga awtoridad sa barangay na tumulong at suportahan ang lungsod sa paglulunsad ng programang tutugon sa suliranin. (ANDI GARCIA)
The post Mayor Honey, maglulunsad ng programang magpapaunlad ng reading comprehension ng mga kabataan appeared first on Police Files! Tonite.
Source: Police Files Tonite
Walang komento: