OP – Opisyal Pasyal

Hindi na mabilang sa daliri ng kamay ang dami ng pag-alis ni Boy Pektus patungo sa ibang bahagi ng mundo upang ilako ang kagandahan ng bansa at ng bagong pamahalaan. Isang opisyal na gawain upang makapangalap ng mga negosyanteng mamumuhunan sa bansa. Sa pagbisita sa iba’t – ibang bansa, kausap ni Boy Pektus ang lider sa isang state visit na magpapalakas sa relasyon ng dalawang bansa. Maganda ang pagtanggap ng mga lider kay Boy Pektus, ngunit ‘di nangangahulugan na papasok ang negosyo sa bansa na siyang layon ng pagbisita. Ang maayos ang pagtingin at ang mahikayat ang mga negosyante na maglalagak puhunan sa bansa’ ang siyang kulang sa ginawang pagbisita. Dito kapos sa resulta ang mga opisyal-pasyal, malaki ang gastos subalit puro pangako ang naiuuwi.

Sa mga Opisyal-Pasyal, walang pagsusuma ng gastos at bulag si Mang Juan sa laki ng gastos na walang Return of Investment na nakikita. Sa laki ng gastos sa opisyal-pasyal masasabing pwedeng nagamit ang salapi na pantapal sa taas ng presyo na tuwiran ang pakinabang ni Mang Juan. Hirap at nakasimangot si Aling Marya sa taas ng presyo ng mga binibili habang nakangiti ang mga sabit sa opisyal pasyal. Sa totoo lang, sa dami ng mga sabit na ‘di lang opisyal ng bayan, higit ang mga miron na ibig makakuha ng pwesto sa pamahalaan, na sa aga’y pasanin na ng bayan. Paano na kung maka-pwesto pa?

Sa pagtingin sa Opisyal Pasyal ni Boy Pektus, masasabing ang adhikain nito’y sa sarili at ‘di sa bayan. Ang gawang ito’y pagbabangong puri sa lahi na minsan ng pinatalsik ng ngitngit ng bayan dahil sa korapsyon. Malinaw na pinepektusan ang nakakausap sa paglalahad ng kasinungalingan sa nakaraan hinggil sa pandarambong na ginawa ng ama. At dala kuno ang kasaysayan at patunay sa pagkakahalal nakuha ang pinakamalaking boto sa kasaysayan ng halalan sa bansa. Subalit kibit balikat ang tugon ng mga lider higit ang mga negosyanteng magbibitbit ang puhunan sa bansa. At dahil ‘di nakumbinsi, malamang sa pag-uwi, pasalubong nito kay Mang Jua’y pangakong ‘di mapanghahawakan. Kita sa mga nakaraang opisyal-pasyal ang resulta, ano pa ang aasahan. Subalit di’ bale na ibangon ang puri ng pamilya, saka na ang para kay Mang Juan at sa bayan.

Sa kasalukuyan nasa Estados Unidos si Boy Pektus at nakikipagbolahan kay Pres. Joe Biden na tila positibo sa usaping tinalakay. Sa kabila nito, patuloy na nahahati ang bayan sa ayudang pahayag na binangit ng nakaraang liderato na makiling sa mga Tsekwa. At nariyan ang anti-EU na grupo na naglabas ng sariling pahayag hinggil sa ‘di magandang maidudulot kuno ng EDCA sa seguridad ng bansa. Ang pahayag ng mga ito’y taliwas sa tindig ni Boy Pektus, tunay na iba ang tindig ng bansa kung pagbabasihan ang galaw at pahayag ni Boy Pektus. Hayan dinalaw pa ang Estados Unidos.

Ang OpisyaL-Pasyal sa Estados Unidos, ang una sa tatlong viaje ni Boy Pektus at ng sandamukal na kasama. Sa pagtatapos ng pagbisita sa EU, patungo sa London at katawanin ang bansa sa panunumpa ng bagong hari ng Britanya. Ikinasiya ni Boy Pektus na makapunta’t mabigyan ng pagkakataon na maka-usap ang hari. Ito’y isang prebilehiyo lalo’t sa taong nagbabangong puri sa nakaraan. Marahil mapipinturahan ni Boy Pektus ang imahe ng pamilya sa uupong hari kung mabibigyan ng pagkakataon. At siyempre nariyan na ito naman ang inimbitahan na dalawin ang bansa sa darating na panahon. Mahalaga ang pagkakataon sa isang dating pinalayas ng sambayanan na makadaumpalad ang hari.

Sa pagdalo sa inagurasyon ng hari at sakaling makausap, isang karangalan at asahan ba ipasisilip sa mundo na kausap ang isang hari. Napakagandang imahe ang mailalabas at tiyak ang pagpipintura sa lahi ang una bago ang bansa. Sa pagtatapos ng inagurasyon, nariyan na makakasama ni Boy Pektus ang iba’t ibang lider ng mga bansa na nagpapaganda sa imahe nito sa mundo. At siyempre, darating ang mga bagong imbitasyon at panibagong opisyal-pasyal.

Hindi mawawala sa iskedyul ang makipagkita sa mga Pinoy sa Britanya at magbibida ng kagalingan ng pamahalaan. At kilitiin ang mga dumalo sa pagtitipon sa anak na laging nakabalatay. Masisilayan na ayaw itong ipakilala kuno lalo sa mga dalaga o kababaihang Pinay na humahanga sa anak. Siyempre hindi mawawala ang biruan na “available ito para sa mga dalagang Pinay na kasama sa pagtitipon. At kung may makuhang panahon sa pagtitipon kasama ang ilang business leaders, pilit na ipapasok ito sa skedyul ng ipakilala muli ang bansa at hihimukin na maglagak ng negosyo sa bansa.

Mula sa London, tuloy ang ligaya sa paglalakbay dahil tutungo ang grupo ng OP sa kalapit na bansang Indonesia kung saan magkakaroon ng pagpupulong ang lider ng ASEAN. Tulad ng dati, mag-uusap ang mga lider sa tindig hingil sa usapin ng mga teritoryo. Paiigtingin ang relasyon hingil sa seguridad ng rehiyon higit laban sa mga bansang umaangkin sa mga karagatan sa rehiyon. Sa pag-uusap masasabing magtutuloy tuloy ang mapayapang rehiyon na magpapalakas sa grupo ng ASEAN. May pag-uusap sa negosyo’y ngunit ang kahalagahan ng seguridad ang pangunahing pag-uusapan.

Sa totoo lang, napaka sarap ang buhay ng lider ng bansa gamit ang pera ng bayan at na iibigan ang opisyal-pasyal kasama ang maraming kaibigan na pasanin ng buwis ni Mang Juan. Dahil kasama ang mga kaibigan, nariyan ang iba’t – ibang paraan upang mapansin ni Boy Pektus at maibulong ang pwestong ibig. At marahil ito ang dahilan ng pagsusumiksik ng makakuha ng upuan sa opisyal-pasyal na hilig ni Boy Pektus. Ang mapansin ni Boy Pektus at masabing nasa panig nito’y bentahe upang makamit ang nais. Ang panahon na ilalaan sa opisyal-pasyal ang mabilis na paraan upang mauulingan at masayaran ng kaginhawahan. Marami ang nag-aasam ngunit iilan ang nabibiyayaan higit ang mga nakakasama sa Opisyal-Pasyal na ibig na ibig ni Boy Pektus.

Maraing Salamat po!!!

The post OP – Opisyal Pasyal appeared first on Police Files! Tonite.

Source: Police Files Tonite