TINIYAK ni Senator Christopher “Bong” Go na ipaprayoridad ng pamahalaan ang mga public utility drivers o ang mga bus, jeepney at tricycle drivers sa mabibigyan ng libreng bakuna laban sa COVID-19 para makabangon ang transportation sector at ang ekonomiya ng bansa.
Matapos mamahagi ng ayuda sa tinatayang 1,516 miyembro ng Tricycle Operators and Drivers Association sa Quezon City noong Miyerkoles, sinabi ni Sen. Go na ang public utility drivers ay dapat na isama sa priority list ng essential workers dahil kabilang sila sa matinding naapektuhan ng pandemya at nawalan ng kabuhayan.
“Unang una, [medical] frontliners, senior citizens … tapos mga indigent. Halos lahat dito ‘isang kahig, isang tuka’. ‘Yun ang priority natin, ang mga taong kailangang lumabas ng bahay,” sabi ni Go.
“Kasama rin ang [public utility] drivers dahil sila ang nangunguna sa transportasyon. Paano sila babalik sa normal nilang pagmamaneho kung ‘di sila nababakuna? Kasama sila sa essential workers ng ating lipunan,” idinagdag niya.
Target ng gobyerno na makapagbakuna ng 50 hanggang 70 million Filipino para maabo ang herd immunity laban sa virus ngayong taon.
“Ito naman pong pagbabakuna ng national government in coordination ito with LGUs … well-coordinated dapat ‘yan para walang malimutan, walang makaligtaan, lalo na po ang mga mahihirap nating kababayan,” ayon sa senador.
“Mayro’n tayong tinatawag na road map sa pag-implementa ng vaccine. And I’m sure lahat naman ng LGU may data ‘yan up to barangay kung sino po ang mga tao,” paliwanag niya.
Sinabi pa ni Go na marami pang takot sa ngayon kaya dapat patunayan ng gobyerno na ang bibilhing bakuna ay safe at effective para makuha ang kumpiyansa ng taumbayan.
“Gusto nila magpabakuna pero nagtutulakan ang mga ‘yan. Kapag nakuha na natin ang kumpiyansa … sigurado kami na tuloy-tuloy ang pagbabakuna dahil sino ba naman ang hindi gustong bumalik sa normal ang pamumuhay?” ani Go. (PFT Team)
The post Bong Go: PUV drivers, uunahin din sa bakuna appeared first on Police Files! Tonite.
Source: Police Files Tonite
Walang komento: