Pulis nasawi, misis na buntis at 2 kamag-anak sugatan sa aksidente

ISABELA – Nasawi ang isang pulis at sugatan ang kanyang misis na buntis at dalawang kamag-anak nang sumabog ang gulong ng minamanehong kotse at bumangga sa isang dumptruck sa kahabaang ng national highway sa Barangay Magsaysay, Cabatuan, Isabela nitong Martes ng umaga.

Ayon kay Lt Florencio Molina, deputy chief ng Cabatuan Police Station, habang binabagtas ng kotseng Vios na minamaneho ni Patrolman Gilbert Ayson, nakatalaga sa 2nd Isabela Mobile Force Company, nagtaka itong mag-overtake nang sumabog ang gulong nito sa harapan at bumangga sa kasalubong na dumptruck.

Nadamay din sa aksidente ang isang multi-cab, dalawang SUV at isang nakaparadang tricycle.

Ang mga biktima ay papunta sa Lunsod ng Santiago para magpa-check up sana sa isang klinika ang buntis na misis ni Patrolman Ayson.

Ang dumptruck naman na minamaneho ni Manuel Calderon ay papunta sa Cauayan City mula sa San Mateo, Isabela.

Ayon kay Calderon nakita niyang pumutok ang gulong ng kotse, dahilan ng pagkabangga sa dumptruck na nawalan din ng kontrol nang pumutok ang isang gulong nito kaya nagkaroon ng karambola ng mga sasakyan.- REY VELASCO

The post Pulis nasawi, misis na buntis at 2 kamag-anak sugatan sa aksidente appeared first on Police Files! Tonite.

Source: Police Files Tonite