MULI binura ng kabisera ng bansa ang nauna nang naitalang record sa dami ng mga indibidwal na nabakunahan sa loob ng isang araw nang makapagtala ito ng panibagong record na 25,668 na nabakunahan noong Lunes,June 14, 2021.
Sinabi ni Manila Mayor Isko Moreno na patunay ang maraming tao na napauwi dahil hindi umabot sa cut-off sa kagustuhan at hangarin ng mga Manileño na mabakunahan.
Dahil dito ay humihingi ng pangunawa ang alkalde sa mga hindi umabot sa cut-off at sinabing hangad ng pamahalaang lungsod na mabakunahan ang mas maraming tao, ngunit limitado ang bakuna sa kasalukuyan.
Pinasalamatan ni Moreno ang pambansang pamahalaaan lalo na si Pang. Rodrigo Duterte at vaccine czar Carlito Galvez, Jr. para sa inilaang bakuna sa Maynila. Pinuri din niya ang mga residente ng lungsod sa paniniwala at tiwala nito sa vaccination campaign na inilunsad nilang dalawa ni Vice Mayor Honey Lacuna noong unang bahagi nang nakaraang taon.
Sa all-time high record na naitala ng lungsod, 11,004 vaccines ang ibinigay bilang first dose habang 14,664 ang naibigay bilang second dose.
May kabuuang 10,165 vaccines ang naibigay sa A4 category o tinatawag na economic workers, bilang first dose nang pareho ding araw.
Pinasalamatan ni Moreno ang the vaccinating teams sa pamumuno ni Lacuna at Manila Health Department chief Dr. Arnold Pangan, dahil sa pagkakarehistro ng panibagong all-time high record na naitala ng Maynila kung saan may 22 vaccination sites na ang nag-o-operate kabilang na ang apat na malalaking shopping malls.
Ang iba pang 18 sites na pawang mga pampublikong paaralan at nakakalat sa anim na distrito ng Maynila ay nag-o-operate sa loob ng 14-oras mula alas-6 ng umaga hanggang alas-8 ng gabi.
Habang sinusulat ang balitang ito, ang kabuuang bilang na ng mga bakuna na naipamigay sa Maynila ay 354,142 doses. Sa nasabing bilang 242,977 ay first dose habang 111,165 ay second dose.
Sa kasalukuyan ay may l,199 aktibong kaso ng COVID-19 sa Maynila kung saan Sampaloc ang may pinakamataas na bilang ng aktibong kaso sa bilang na 237. (ANDI GARCIA)
The post 25,668 nabakunahan sa isang araw — Isko appeared first on Police Files! Tonite.
Source: Police Files Tonite
Walang komento: