PINATAWAD na Manila Mayor Isko Moreno ang 17-anyos na TikToker na nagmura at nag-dirty finger sa kanya sa isang video post nito sa social media na umani ng katakot-takot na galit mula sa mga netizens. Bukod sa pagmumura ay kung ano-ano pang masasama ang sinabi ng 17-anyos sa kanyang account sa alkalde kabilang na wala daw ginagawa si Moreno sa Maynila.
Ang menor-de-edad ay sinamahan ng kanyang guardian at opisyal ng barangay sa tanggapan ni Col. Jhun Ibay, hepe ng special mayor’s reaction team (SMART) sa Manila City Hall kung saan personal itong humingi ng tawad hindi lang sa alkalde kundi maging kay Ibay at sa kanyang guardian.
Nang kapanayamin ay inamin ng menor-de-edad na siya ay nasa impluwensya ng alak at gumagamit siya ng fake identity sa kanyang social media account.
Sinabi pa ng menor-de-edad na napagdesisyunan niyang magtungo sa tanggapan ni Ibay matapos na makatanggap ng pagbabanta mula sa mga galit na galit na netizen kahit tinanggal na niya ang kanyang post.
Pinagalitan ni Ibay ang menor-de-edad dahil sa pagkaladkad niya sa Ateneo de Manila University dahil nilagay nito na dito siya nag-aaral. Sinabihan din ni Ibay ang guardian na huwag itong payagang uminom ng alak dahil ito ay menor-de-edad pa lamang.
Sa isang text message, sinabi ni Ibay na susulatan na niya ang Ateneo nang biglang dumating ang menor-de-edad sa kanyang tanggapan.
Sinabi ng menor-de-edad na siya ay nag-aaral sa PUP, gayunman hindi sigurado si Ibay kung totoo ito.
Sinabi naman ni Moreno na nalaman na niya ang mga pangyayari kung kaya’t inutusan na lang niya si Ibay nna pauuwiin ang menor-de-edad nang walang kaso.
Maging ang guardian ng menor-de-edad ay humingi sa paumanhin kay Moreno at pinasinungalingan ang mga pinagsasabi ng kanyang alaga sa post nito at sinabing nakakatanggap siya ng mga benepisyo mula sa pamahalaang lungsod bilang senior citizen tulad ng monthly allowance at food boxes.
Makikita sa tinanggal ng video post ng menor-de-edad na minumura niya at nag-dirty finger siya sa alkalde. (ANDI GARCIA)
The post Isko, pinatawad ang 17-anyos na TikToker na nagmura at nag-dirty finger sa kanya appeared first on Police Files! Tonite.
Source: Police Files Tonite
Walang komento: