PABALIK-BALIK ang usapin ng pagbaba at muling pagdami ng mga kaso ng C19 sa mundo, maging sa bansa. Hindi malaman ng mga namumuno sa bansa kung paano masawata ang pandemya na nagpaluhod sa kabuhayan. Sa kasalukuyan, may bagong variant bukod sa Delta, ang Lambda variant na inaalam ang tunay na epekto sa mga tinamaan ng pandemya. Sa Pinas muling ibabalik ang ECQ sa maraming lungsod at lalawigan na nagbunsod sa panibagong lockdown.
Nangangamba si Mang Juan na hindi regular ang hanapbuhay kung paano matustusan ang pangangailangan ng pamilya sa dalawang linggong ECQ na magpapabigat sa kanilang buhay. At sa mga regular ang katayuan sa hanap buhay, nariyan na nagkakaroon ng bawas oras sa pagpasok dahil kailangan sumunod sa alituntunin ng pagpapairal sa mga lugar sa ECQ. Limitado papasok sa trabaho at hinihikayat ang karamihan na manatili sa bahay ng maiwasan ang pagkalat ng pandemya. Usapin ito na kung paano babakahin ang dalawang linggo na walang pera at kung may madale pa ng pandemya, paano na?
Masakit kay Mang Juan na makita ang anak at apo na magkapandemya’t hindi madala sa pagamutan dahil sa kawalan ng pera. Bukod pa dito, kitang kita ang haba ng mga taong nakapila na nagbabakasakaling palarin na masilip ng doktor. Sa muling pagdami ng may C-19, nangangamba ang mga administrador ng mga pagamutan lalo ang nasa pampubliko sa muling pagdagsa ng mga pasyente gayung hindi nadagdagan ang kanilang mga gamit at tauhan na humaharap sa mga may C19.
Bumalik ang dating kalagayan ng mga hospital na kapos sa lahat ng kailangan tulad ng unang sigwa ng pandemya, higit sa mga pagamutan sa mga pangunahing lunsod sa bansa. Kulang na kulang ang aksyon ng pamahalaan lalo sa ngalan ng pagbabakuna na siyang sagot upang mapigilan ang pagkalat nito. Karamihan sa Pinoy’ nagdududa sa kapasidad ng bakunang tinutulak ng pamahalaan, ang SINOVAC at naghihintay ng ibang brand bago magpaturok.
May basehan ang pag-aagam agam ni Mang Juan dahil sa balita galing sa karatig bansa na hindi mabisa ang bakunang galing Tsina lalo sa Delta variant, paano pa sa Lambda? Sa dami ng perang inutang ng pamahalaan para sa bakuna, bakit hindi kumuha ng bakunang mataas ang efficacy rate sa halip na magtitiis sa tila tubig at walang epektong SINOVAC.
Sa kalakaran ng katotohanan, malungkot mang sabihin, ang pagharap ng pamahalaan sa pandemya’y malamya at walang direksyon. Madalas galing sa OCTA research group ang datos at rekomendasyon hingil sa kaganapang umiiral sa mga pangunahing lunsod sa bansa. Bakit ‘di buwagin ang Task Force at hayaan ang OCTA gawing Task Force. Tila wala ng silbi ang IATF kung pagbabatayan ang galaw. O’ ginagamit ang pagiging malapit kay Totoy Kulambo upang manatili.
Silipin natin ang roll-out ng bakuna, sa kasalukuyan mayroong kabuuang 37.275M na bakuna ang dumating sa bansa na nakakagalak. 19.5M ang SINOVAC, 1M dito ang donasyon. Ang AZ may kabuuang 7.273M, 6.123M ang sa donasyon at 1.58M ang binili ng pamahalaan. Moderna 3.5M ang dumating, 500K ang binayaran at 2.9M ang donasyon. Sa Pfizer 3.14M ang dumating, 938K binili. J&J 3.24M lahat donasyon at Sputnik 359K, lahat binili.
Sa mga datos na ito, malinaw ang pagtutulak ng pamahalaan ng paggamit ng bakunang galing sa Tsina. At sa takbo ng datos, ang ginastusang bakuna ang may pinakamababang efficacy rate laban sa Delta variant na nakakabahala para kay Mang Juan. Ang masaklap dito, hindi makalap ang datos sa mga donasyong bakuna na napanis o nawalan ng bisa dahil napabayaan ang mga ito. Mahigit 1M bakuna na nasayang dahil sa palpak ang cold storage na paglagakan nito.
Tunghayan ang kaganapan sa mga pagamutan sa bansa. Batid ng pamahalaan ang muling pagtaas ng kaso ng C19 sa bansa. Ang masakit nito, marami sa mga pagamutan sa bansa lalo ang mga primary at secondary hospitals ang nagsara dahil sa ‘hindi na kaya ang magpatuloy ng operasyon dahil sa hindi nababayarang utang ng pamahalaan. Sa paghahalungkat ng datos, may P26B utang ang Philhealth sa mga pribadong hospital mula ng pumutok ang pandemya noong 2020 na hanggang sa kasalukuya’y hindi nababayaran sa ‘di malamang dahilan.
Ang hindi pagbabayad na ito ang nagbunsod sa mga hospital na magsara dahil naubos ang puhunan upang tugunan ang pasyente. Hindi makapagreklamo ang mga may ari ng hospital sa takot na balikan at nagkaproblema sa hinaharap. Sa St. Luke’s Medical Center, mahigit P2B ang bayarin ng Philhealth. Habang sa mga doktor na naniningil ng professional fee (PF) may babala na maari makasuhan kung ipagpapatuloy ang paniningil sa pasyente. Ang siste, sa dami ng ginagamot na may C19 wala ni kusing silang makukuha sa Philhealth. Ang tanong, eh sino ang may sala?
Masakit ang katotohanan na bagsak ang serbisyong binibigay ng pamahalaan sa mamamayan. Ang kawalan ng balangkas sa pagharap sa mga usapin ang naglalagay sa panganib sa buhay ni Mang Juan at ng pamilya nito. Umaasa na lang ang pamahalaang ito sa mga pribadong sector na siyang nagbibigay direksyon at solusyon sa mga problema. Walang proactive action at umaasa na lamang sa iba, buwagin na ang IATF. Nariyan pa ang mga kahambugan na akala mo’y may kagalingan gayong walang ambag sa paglutas ng mga suliranin, ginogoyo lang ng mga tauhan at ‘di batid ang kaganapan.
Sa totoo lang ang mga usapi’y pabalik-balik na parang tsubibo na walang katapusan. Sa darating na ECQ, Mang Juan alagaan at sabihan ang mga anak na mag-ingat dahil ‘di kaya ng pamahalaang ito na itaguyod ang kagalingan ng nakararami. Bumawi na lang tayo sa bandang huli. Tama na sa mga Duterte!
Maraming Salamat po!!!
The post Usaping pabalik-balik appeared first on Police Files! Tonite.
Source: Police Files Tonite
Walang komento: