Bong Go: Kitang-kita ang mga gusto magpasikat, mahilig sa satsat

Ipinaalala ni Senator Christopher “Bong” Go sa mga kapwa pulitiko ang kahalagahan ng pagpapakumbaba sa pagseserbisyo sa publiko.

Idiniin niya na hindi nalilingid sa Filipinino kung sino ang mga lider na tunay na tumutulong at kung sino ang pulos salita o satsat lamang.

“Kaysa tayo tayo ang nagbubuhat ng ating sariling bangko at nagpapagalingan, hayaan nating ang taumbayan ang humusga sino ba talaga ang nagtatrabaho at nagseserbisyo at sino ba talaga ang puro salita,” ayon kay Go.

“Hindi niyo na po kailangan i-enumerate ang mga nagawa ninyo. Kung totoo ‘yan, hayaan ninyo na ‘yung mga nakabenepisyo ang magsalita. Nasa gitna pa po tayo ng pandemya, pero pansin na pansin na ang mga gusto magpasikat,” idinagdag ng senador.

Sa kanyang privilege speech, iginiit sa halip ni Go sa mga kasamahan sa Senado na makipagtulungan na lang sa executive branch para malampasan ng bansa COVID-19 crisis.

“Nasa public health emergency po tayo ngayon. Pandemya po ang kalaban natin at hindi ang isa’t isa. Panahon ito ng pagtutulungan at pagbabayanihan. Huwag natin sayangin ang oras sa siraan at sisihan,” sabi ni Go.

Sinabi rin ni Go sa mga kritiko na imbes ibato ang lahat ng sisi sa Duterte administration, dapat ay magtulong-tulong ang lahat para makabangon na tayo sa pandemya.

“Huwag niyo po isisi sa Executive lahat ng mga problema ng bansa dahil pare-pareho lang naman tayo ditong nagsisilbi sa bayan.”

“Pero kung may pagkakamali sa implementasyon, panagutin. Huwag ninyo po isisi sa kanila ang inabutan nilang sistema dahil resulta yan ng ilang taong mga batas na naipasa rin mula sa plenaryong ito na kinagisnan nalang ng lahat at pilit nating isinasaayos. Kaya nga ito tinawag na ‘in aid of legislation’ para ayusin ang dapat ayusin,” ang sabi ni Go.

Muling idiniin ng senador na mismong si Pangulong Duterte ay ayaw ng katiwalian sa gobyerno.

“Kahit sino ka man, kahit saan ka man nanggaling, kahit tumulong ka pa noong election kay Pangulong Duterte, marami na pong nasibak diyan, kapag pumasok ka sa korapsyon, yari ka po,” aniya.

“We are one with you in eradicating corruption in this country. Now, if you believe that people have committed crimes and should be punished, then file the necessary cases or give our prosecutors sufficient evidence to ensure that these people are indeed punished,” idinagdag ni Go.

The post Bong Go: Kitang-kita ang mga gusto magpasikat, mahilig sa satsat appeared first on Police Files! Tonite.

Source: Police Files Tonite