RAMDAM na ang panahon ng tag-init sa bansa na kahit hindi ka kumikilos ramdam ang pagtulo ng pawis sa leeg o sa likuran ng katawan. Hindi maiwasan na magdagdag ng bilang ng pagligo upang maibsan ang alinsangan ng panahon. Kabi-kabila ang pag-abaniko o pamaypay upang kahit paano mabawasan ang banas na umiirita sa pakiramdam ni Aling Marya. Mahasik ang pagsaway ng matanda sa mga anak dahil sa panahon na lubhang nakakainit ng ulo lalo’t habol ang pangangailangan sa bahay na ‘di maibigay ng asawang hirap sa pamamasada dahil sa dalan ng mananakay at taas presyo ng petrolyo.
Ang pagsala sa oras ng pagkain o pagtawid nito na lagpas sa oras ang malaking dahilan ng lalong pag-init ng ulo ni Aling Marya. Ang patuloy na pagdaing ng mga anak kung kakain na ba o paano ang pasan na usapin sa araw-araw na buhay ng mag-anak. Ang pangungutang sa tindahan ng bigas at ulam ang tanging paraan upang may isasaing na bigas at pang-ulam sa agahan at tanghalian. Asahan na ang nautang na lutui’y paabutin hanggang sa hapunan at babayaran na sa pagdating ng asawa o sa kinabukasan nang muling makautang sa tindahan. At pasalamat sa may-ari ng tindahan at nauunawaan ang kalagayan ng pamilya ni Aling Marya na isang kahig isang tuka.
Karaniwan ang ganitong sitwasyon lalo sa mga nakatira sa mga lugar na ang paghahanap buhay ay nasa gitna ng kakalsadahan. Nariyan na nagmamaneho ng mga sasakyan na maghahatid sa mga obrerong pumapasok sa trabaho na siyang tunay na kaagapay ng bayan sa pagpapa-galaw ng kabuhayan ng bansa. Subalit hindi nakikita ng pangasiwaan ang kalagayan ng mga ito lalo ng mga tsuper. Patuloy ang pagtaas ng presyo ng petrolyo na tila ito na ang pinaghahanap buhay sa maghapong pasada. Mukhang hindi dama ng pamahalaan ang bigat ng pasanin ng mga tsuper lalo’t kada lingo ang pagtaas ng halaga ng kanilang pangunahing kinukunsumo sa araw-araw na pamamasada. Hirap na ang mga ito na makuha sa maghapon ang disenteng kita at problema pa ng kulang kulang na boundary na naabot sa operator.
Ang pahabaan ng pisi sa pagpapasensiya ang tanging gawa sa hirap ng buhay at hanapbuhay na kinakain ng pagtaas ng presyo. Sa pag-uwi nariyan ang asawang asiwa sa init ng panahon at sa haba ng lista ng pagkakautang sa mga tindahan upang may makain ang mamang tsuper sa kanyang pag-uwi.
Sa ilang beses na pagtaas ng presyo ng petrolyo nakikiusap o humihiling ang mga tsuper na magkusa ang Department of Transportation and Railways (DOTr) at sa LTFRB na magpatupad ng pagtaas ng pasahe upang maibsan ang kanilang kalagayan pangkabuhayan. Hindi na kaya ng balikat ang pagtaas ng presyo petrolyo at kahit pababa na ang pandemya ang bilang ng mga mananakay hindi bumabalik sa dati nitong kalagayan. Ang agarang pagpapatupad ng pagtaas ng pamasahe kahit walang petition sa sino mang transport group ang siyang inaasahan sa kagawaran na may tuwirang tumitimon sa mga pampublikong sasakyan. Ang madama ang pag-aaruga ng kagawaran sa mga tsuper na humihiling na bigyan pansin ang kalagayan ang siyang inaasahan.
Hindi na umaasa pa sa kilos ng mga malalaking grupo ng transportasyon na sa dami ng pagtaas ng presyo ng petrolyo’y nananatiling tikom ang bibig sa ‘di malamang kadahilanan. At kung pagbigyan ang kahilingang pagtaas ng pamasahe ng mga pampublikong sasakyan at maging ng mga taxi, ang pagbibigay ng taripa at calibration ng metro’y gawing libre na kahit paano’y hindi na maagaw ang konting halaga para sa pamilya ng mga tsuper at maging sa mga operator, lalo na sa may mga isa o dalawang jeep o taxi ang meron ito.
Batid ng mga tsuper na ang kahilingan ito’y suntok sa buwan lalo’t hindi galing sa organisadong grupo na tila takot sa makisig na kalihim na wala ang puso sa maliliit na tsuper. Ang tanging layon ng kahilinga’y ang nakapag-uwi ng pantustos sa araw – araw para sa pamilyang umaasa at hindi pabigat sa suking mananakay. Inaasahan na nagtetengang kawali ang kalihim sa hinihiling dahil hindi masiguro ang pangako na dadalhin ang inaalok na manok sa halalan. Hindi umaasa sa ikinikilos ni ThirDy Delgra ng LTFRB dahil sunod sunuran ito sa kalihim at mababaw ang liderato nito sa pinangangasiwaang opisina na madalas na iniisahan ng mga tao nito na ginagamit ang ngalan sa pananakot at pangungurakot sa mga tsuper.
May pinapaabot na karagdagang kahilingan ang mga tsuper, sa MMDA at sa mga LGUs na pairalin ang pagiging makatao sa panghuhuli lalo’t ang kadalasan ng dahilan nito’y may relasyon sa pamamasada. Mabigat ang isang huli lalo’t ang halaga ng pagtubos nito at pagliban sa pamamasada dahil sa pag-aayos ng aberya. Konsiderasyon ang hinihingi lalo sa panahon na malaki ang daang piso na mawawala na pang-uwi sa pamilya. At kung malas sa araw, ang paggapang upang makakuha ng pasahero’y ginagawa upang may kitain sa maghapong pamamasada. Huwag na sanang agawin ng mga buwaya sa kalye at pagbigyan ang mga tsuper lalo sa panahong ito. Hindi mabigat sa mga tsuper ang mag-abot ng konti lalo’t maganda ang pasada sa maghapon. Ang kamahalan ng petrolyo ang numero unong usapin at ang mga buwaya sa daan ang pangalawa.
Sa mga nakaambang pagtaas ng presyo ng petrolyo, nariyan ang ayudang binabangit ni Totoy Kulambo na Php200.00 ngunit hindi pipigilan ang pagtaas ng halaga nito. Walang balak ang pamahalaan na makinig sa hinihiling ng tsuper na alisin ang mga buwis sa produktong petrolyo at ang pagbibigay na makapag taas ng pamasahe. Ang pagbibigay ng ayudang ‘di sapat ang sagot ng pamahalaan sa mga tsuper na hikahos ang kabuhayan at ito’y hindi sapat na maibsan ang pangangailangan ng mga tsuper sa araw-araw. Hindi pangmatagalan ang hinihiling na dagdag pasahe at tulad ng dati, ibabalik sa mga pasahero sa araw na bumalik sa dating kaayusan ang presyo ng petrolyo at ang viaje. Hindi naghahanap ng labis ang mga tsuper, sa halip ang maabot ang pangangailangan ng pamilya ang nasa-isip at hindi ipagkakait kung dapat ng ibalik ang labis. Ang mapakain ang pamilya at mapag-aral ang mga anak ay sapat na sa mga tsuper .
Sa pamahalaan huwag ihiwalay sa pandama ang hiling ng mga nagdurusang mga tsuper. Ang pagtaas ng presyo ng petrolyo ay tila cancer na unti-unting kumikitil sa buhay ng mga ito at ng pamilya nito. Ang malayong agwat ng kabuhayan ng mga tsuper at ng mga tao sa puno ng Balite ng Malacanan, maging sa opisyal ng DOTr at LTFRB ang katotohanan na suntok sa buwan ang kahilingan ng mga tsuper. Ang nakapiring na mata ng kalihim ng DOTr ang malaking balakid sa hinihiling.
Subalit kahit suntok sa buwan ang kahilingan ipinaabot ng tsuper sa pamamagitan ng pitak na ito na galawan ang kahilingan na makapagtaas ng pasahe upang maibalik ang nawalang kita dahil sa taas ng presyo ng petrolyo, muli galawan ang kahilingan ng mga tsuper…
Maraming Salamat po!!!
The post Kahilingan ng tsuper appeared first on Police Files! Tonite.
Source: Police Files Tonite
Walang komento: