SANTIAGO CITY – Nauwi sa madugong trahedya ang isang birthday party na ikinasawi ng isang ama habang malubhang nasugatan ang anak nito nang pagsasaksakin ng stepson na natalo sa bunong braso ng kapatid nito, nitong Biyernes ng umaga sa bayan ng Rizal.
Kinilala ang nasawi na si Roel Fabro, 46 anyos; habang inoobserbahan sa ospital ang 15 anyos na anak nitong lalaki.
Hinahanap pa ng pulisya ang salarin na kinilalang si Jeffrey Pusilero, 27, ng San Antonio, Ramon Isabela.
Sa report ng Santiago City Police Office (SCPO) Station 2, parehong bisita ang mag-ama at si Pusilero sa isang birthday party sa nasabing lugar.
Habang nag-iinuman, niyaya ng batang Fabro ang kuya nito na si Pusilero ng bunong-braso subali’t natalo niya ito ng tatlong beses na nauwi sa asaran.
Nagalit si Pusilero at niyaya nito ng suntukan ang batang kapatid. Nakita ng matandang Fabro na tangkang suntukin ng kanyang stepson ang anak kaya umawat na ito.
Sa halip na makinig si Pusilero sa amahin, nagalit ito sabay kuha ng kutsilyo nitong sukbit at pinagsasaksak ang stepdad sa iba’t ibang parte ng katawan, sanhi ng kamatayan nito.
Sunod na hinabol ni Pusilero ang kanyang kapatid at sinaksak sa katawan saka mabilis na tumakas.
Dinala sa ospital ang batang Fabro para lapatan ng lunas ang tinamong sugat.
Nanawagan ang ina ni Pusilero na si Gigi Domingo na sumuko na ito sa mga awtoridad at panagutan ang ginagawang krimen.
Sinabi naman ni Domingo na mayroon narin hidwaan ang kanyang anak at asawa dahil sa pagnanakaw ni Pusilero ng mga alagang kalapati ng biktima.
The post Stepson talo sa bunong braso, nanaksak: Ama patay, utol kritikal appeared first on Police Files! Tonite.
Source: Police Files Tonite
Walang komento: