HINDI maikakailang matindi ang paghanga at paniniwala ni Direk Louie Ignacio kay Comedy Concert Queen Ai Ai delas Alas.
Ito ay dahil sinabi ni Direk Louie sa isang story con kamakailan na kung hindi rin lang daw si Ai Ai ang gaganap na pangunahing bida sa kanyang pelikulang Litrato ay di baleng huwag na lang daw ito gawin.
Tsika ng nasabing direktor, “Sabi ko nga kay Nay Len (Carrillo) nang mag-usap kami, kapag iba po ang gaganap, ‘wag na nating ituloy ang pelikula. Kaya kay Ai Ai po talaga.”
Dinagdag pa ni Direk Louie na marami anyang aabangan sa Litrato at matindi ang twist na mangyayari rito.
“Ang Litrato ay isang drama na pelikula na noong inisip ko ang konseptong ito, wala akong ibang inisip kundi si Ai Ai ang gaganap bilang Lola Edna,” paliwanag pa ni Direk Louie.
Si Ai Ai ay gaganap sa Litrato bilang lola na may Alzheimer’s disease kaya inaasahan na ang muling paglabas ng husay ng komedyana sa pag-arte.
Ang 3:16 Media Network ang magpoprodyus ng movie mula sa panulat naman ni Ralston Jover.
Hindi napigilan ni Ai Ai na maging emosyunal sa papuring natanggap kay Direk Louie.
“Lagi kong sinasabi sa kanya, ‘Direk thank you na parati kang naniniwala sa kakayahan ko. Tulungan mo na lang ako na maitawid ko ito nang maganda. Kailangan ko ang tulong mo at lahat ng kagalingan mo ay ilabas mo rito.
Dagdag pa ng Comedy Concert Queen na masuwerte anya silang pareho ni Direk Louie na lagi silang nananalo sa pelikula.
“Siguro ‘yung vibes at feng shui. So praise God for that,” anya pa.
Ang Litrato ay tungkol sa isang matandang babae na may Alzheimer’s disease at nasa care facility. Nanghihingi ito ng mga litrato mula sa mga taong hindi niya kilala dahil walang dumadalaw sa kanya.
Magbabago ang buhay ni Lola Edna sa pagdating ng isang istriktong nurse.
Pinatunayan naman ang suwerte ng dalawa sa ia’t isa sa pananalo sa iba’t ibang filmfests ng kanilang mga ginawang pelikula gaya ng Area at School Service kung saan nanalong best actress si Ai sa Cinemalaya.
Kasama ni Ai Ai sa Litrato sina Ara Mina, Quinn Carrillo, Bodjie Pascua, Duane David at Rowan Diaz. (BLESSIE K. CIRERA)
The post Direk Louie ‘di gagawin ang pelikula ‘pag ‘di si Ai Ai ang bida appeared first on Police Files! Tonite.
Source: Police Files Tonite
Walang komento: